Do Chearta Teanga

An Comhairle Contae

Tá sé de cheart ag muintir Dhún na nGall plé leis an Chomhairle Contae trí mheán na Gaeilge.

Seirbhís Labhartha ar an Ghuthán

Is féidir teagmháil a dhéanamh leis an Chomhairle ar (074) 91 53900.

Tabharfar rogha teanga do gach duine a chuireann scairt ar an uimhir sin, idir Gaeilge (brúigh Uimhir 1) nó Béarla (brúigh Uimhir 2).

Seirbhís Scríofa (Comhfhreagras & Litreacha)

Tá de cheart ag an phobal comhfhreagras scríofa a chur chuig an Chomhairle Contae. Caithfidh an Chomhairle freagra a thabhairt ar an chomhfhreagras sin i nGaeilge.

Nuair a fhaigheann tusa comhfhreagras nó litir ón Chomhairle Contae atá ag dul don phobal i gcoitinne, tá dualgas ar an Chomhairle an comhfhreagras sin a chur ar fáil go dátheangach, i nGaeilge agus i mBéarla.

Foirmeacha Iarratais

Tá de cheart agat gach foirm iarratais de chuid Chomhairle Contae Dhún na nGall a fháil i nGaeilge. Mura raibh tú in ann teacht ar leagan Gaeilge den fhoirm iarratais, ba chóir duit dul i dteagmháil leis an Oifigeach Forbartha Gaeilge, ag úsáid na sonraí teagmhála thíos faoi seo, agus déanfar do chás a thaifead agus féachfar le foirm iarratais i nGaeilge a sholáthar duit gan mhoill, i gcomhar leis an rannóg chuí den Chomhairle.

 

Fá choinne ceisteanna a bhaineann le seirbhísí Gaeilge, déan teagmháil le:

Seán Ó Daimhín,
Oifigeach Forbartha Gaeilge
074 91 72496
sdaimhin@donegalcoco.ie

Do Chearta Bunreachtúla & Acht na dTeangacha Oifigiúla

Tá sé de cheart ag an phobal:

1. gach gnó – agus gach cuid den ghnó – a dhéanamh leis an stát trí Ghaeilge agus trí Ghaeilge amháin.
2. freagraí a fháil i nGaeilge ó chomhlachtaí poiblí ar chomhfhreagras fríd an phost nó trí r-phost a scríobhtar sa Ghaeilge.
3. a bheith ag súil go gcuirfidh comhlachtaí poiblí eolas amach (don phobal i gcoitinne) i nGaeilge nó go dátheangach.
4. a bheith ag súil go bhfoilseoidh comhlachtaí poiblí doiciméid thábhachtacha ar leith (Achtanna den Oireachtas san áireamh), atá deimhnithe sa reachtaíocht, i nGaeilge agus i mBéarla.
5. aon ghnó os comhair Thithe an Oireachtais a dhéanamh trí Ghaeilge (chomh maith le coistí, fochoistí agus comhchoistí de chuid an Oireachtais).
6. an Ghaeilge a úsáid in aon chúirt nó i ngnóthaí cúirteanna.
7. a bheith in ann leas a bhaint as gach seirbhís trí Ghaeilge atá comhaontaithe i scéim teanga ag comhlachtaí poiblí. San áireamh anseo tá scéimeanna ar leith a bhaineann le ceantair Ghaeltachta.

Má dhiúltaítear do do chearta teanga, tig leis an phobal comhairle a fháil, nó gearán a dhéanamh, leis an Choimisinéir Teanga anseo: Gabh i dTeagmháil leis an Choimisinéir Teanga